Byrek me sallam si qëmoti

1 pako peta

250 gr sallam si qëmoti

 2 speca

 150 gr djathë i bardhë

150 gr djathë kaçkavall

2 kokra vezë

200 ml qumësht (1 gotë)

Vaj ulliri

Kripë dhe piper (sipas dëshirës)

Presim në kubikë sallamin, specat dhe djathin. Vendosim në një tas specat dhe djathin e bardhë dhe në një tas tjetër bashkojmë sallamin me kaçkavallin. 

Rrahim vezët në një tas dhe shtojmë në të 6 lugë gjelle vaj ulliri. I përziejmë sëbashku dhe shtojmë pak nga pak qumështin, duke e trazuar vazhdimisht. Po ashtu shtojmë dhe kripë dhe piper të zi. Byrekut do t’i japim formën e një keku, prandaj dhe do ta pjekim në një tavë keku. Lyejmë tavën me vaj dhe në fillim vendosim dy petë, duke i rrudhosur dhe duke i nxjerrë nga anët e tavës. Shpërndajmë mbi të speca dhe djath e më pas i mbulojmë me një petë të rrudhosur. E spërkatim me qumështin e trazuar me vaj dhe vezë dhe shpërndajmë sallamin dhe kaçkavallin. Mbulojmë përsëri mbushjen me një petë të rrudhosur, e spërkatim përsëri me qumështin e përzierë, dhe kështu na u formuan 2 shtresa. Kështu vazhdojmë me shtresat, duke i alternuar njëherë specat me djathë e më pas sallamin me kaçkavall. Mund të shtroni edhe dy petë e më pas shtroni mbushjen. *Kjo është në dëshirën tuaj).

Në fund, petët e para që i vendosëm anës tavës, i kthejmë dhe bëjmë mbylljen e byrekut në formë keku. Spërkatim përsëri me përzierjen me qumësht dhe vendosim tepsinë në furrë, në temperaturën 180 gradë për 30-35 minuta. Pasi të piqet e mbulojmë 10 minuta, e më pas e kthejmë në pjatancë.